ഇത് കേരളം കണ്ട ഒറ്റയാൾ സമരം.

ഇതാ, ഇതാണ് "യഥാർത്ഥ" സമരനായകൻ..!!!
-----

ഇത് കേരളം കണ്ട ഒറ്റയാൾ സമരം.
സഖാക്കളേ, ഇതാണ് തന്ത്രപരമായ സമരം.
ബുദ്ധിയും കുബുദ്ധിയും ഉപയോഗിച്ചുള്ള സമരം. ...
എണ്ണിയാലൊടുങ്ങാത്ത ആരോപണങ്ങളിൽ അകപ്പെട്ടു വലഞ്ഞുനിൽക്കുന്ന ഒരു ഭരണാധിപൻ രണ്ടുംകൽപ്പിച്ചു നടത്തിയ എതിർസമരം.
തെരുവിൽ എന്തിനും തയാറായി അണിനിരന്ന പതിനായിരങ്ങളെ, അവരുടെ വിപ്ലവ പാർട്ടികളെ, നേതാക്കളെ അനായാസം മലർത്തിയടിച്ച ഒറ്റയാന്റെ പ്രതിരോധ സമരം.
വിശദമായി, ആഴത്തിൽ എല്ലാവരും പഠിക്കേണ്ട അത്യപൂർവ വിജയചരിത്രം, ജീവചരിത്രം.
കേരളത്തിലെ രാഷ്ട്രീയ തന്ത്ര- കുതന്ത്രങ്ങളിൽ തനിക്കു മീതെ ആരുമില്ലെന്ന് വെളിപ്പെടുത്തി കൂടുതൽ കൂടുതൽ ശക്തി കൈവരിക്കുന്ന ഉമ്മൻ ചാണ്ടി എന്ന ഒരു "പ്രാദേശിക നേതാവിന്റെ" തുടർച്ചയായ വിജയം..!
"ഇനിയാരും എന്റെ നേരെ കൈചൂണ്ടണ്ടാ" എന്ന് കൂടെയുള്ളവർക്ക് മുന്നറിയിപ്പു കൊടുക്കാൻ പാകത്തിൽ ഉറക്കമൊഴിച്ചു പൊരുതിനേടിയ വിജയം.
ഈ "സർക്കാർ വക" വിജയത്തിന്റെ ക്രെഡിറ്റ് വേറെയാർക്കും പോകില്ല, 'മലയാള മനോരമ'യ്ക്കു പോലും..!
------

ഒരുവശത്ത്, ലാവലിൻ കേസും ടി.പി. ചന്ദ്രശേഖരൻ കൊലക്കേസും ഷുക്കൂർ കേസും "കോമ്പ്ലിമെന്റ്സ്" ആയി. (അല്ലെങ്കിൽ അങ്ങനെ ആളുകളെക്കൊണ്ട് പറയിപ്പിക്കാൻ ഉമ്മൻ ചാണ്ടിക്ക് കഴിഞ്ഞു. കാഞ്ഞ ബുദ്ധി തന്നെ..!)

മറുവശത്ത്, സോളാർ കേസും ഉമ്മൻ ചാണ്ടിയും ചാണ്ടി ഉമ്മനും അടങ്ങുന്ന കുടുംബവും സലിം രാജും ഷാഫി മേത്തറും ജിക്കുമോനും ജോപ്പനും രക്ഷപ്പെട്ടു..!
മുഖ്യമന്ത്രി ഉമ്മൻ ചാണ്ടി ഇനി ഒരു തടസവുമില്ലാതെ, ആരുടേയും എതിർപ്പില്ലാതെ അനായാസം കാലാവധി തികയ്ക്കും.
മാണിയും പീസീ ജോർജ്ജും കെ. മുരളീധരനും ബാലാൻ പിള്ളയും മാളത്തിൽ ഒളിക്കും.

അപ്പുറത്ത്,
സമരമല്ല, വിപ്ലവ മുന്നണിയല്ല, "പിണറായി വിജയൻ എന്ന വ്യക്തി" വിജയിച്ചു എന്നതാണ് ശ്രദ്ധിക്കേണ്ടത്..!
അടുത്ത മുഖ്യമന്ത്രിയാകാൻ പിണറായിക്ക് വഴി തെളിഞ്ഞു..! ഉമ്മൻ ചാണ്ടി വഴിയൊരുക്കിക്കൊടുത്തു. അച്ചുതാനന്ദന്റെ അവസാന അവസരവും ഇരുവരും ചേർന്ന് ഇല്ലാതാക്കി.
അച്ചുതാനന്ദനും സിപിഐയും സാദാ സഖാക്കളും വീണ്ടും തോറ്റു തൊപ്പിയിട്ടു..!!
-----
സോണിയയില്ല, രാഹുലില്ല, "ഹൈക്കമാഡ്" എന്ന സങ്കൽപ്പസാധനമില്ല, കെപിസിസി ഇല്ല, ചെന്നിത്തലയില്ല, ഘടകകക്ഷികളില്ല, പി.സി. ജോർജ് അടക്കം കൂടെയുള്ളവർ പലരും പരസ്യമായി വിമർശിക്കുന്നു. ചാനലുകൾ ഒറ്റക്കെട്ടായി ആക്രമിക്കുന്നു. കോട്ടയംകാരനാണെങ്കിലും തിരുവഞ്ചൂരിനെ ഒട്ടും നമ്പാൻ വയ്യ. ഒരു വിഭാഗം പോലീസ് പാര പണിയുന്നു. മുഖ്യമന്ത്രിയാകാൻ വഴിനോക്കി മാണി നടക്കുന്നു. ലീഗ് അവരുടെ വഴിക്ക് പോകുന്നു. മനോരമ പോലും കളംമാറ്റാൻ ഒരുങ്ങി.

എന്നിട്ടും, ആരുടേയും സഹായമില്ലാതെ കേരളം കണ്ട ഒരു വലിയ സമരം പൊളിക്കാൻ സ്വയം ഇറങ്ങിത്തിരിച്ചു കേവലം രണ്ടുനാളിനുള്ളിൽത്തന്നെ വൻ വിജയം കണ്ട ഉമ്മൻ ചാണ്ടിക്ക് ആയിരമായിരം അഭിനന്ദനങ്ങൾ.
ശരിക്കും ഇതൊരു ഒറ്റയാൾ യുദ്ധമായിരുന്നു. എന്നിട്ടും ഏറെ ബുദ്ധിമുട്ടാതെ വിജയം. ഏകപക്ഷീയ വിജയം എന്നു പറഞ്ഞാലും തെറ്റില്ല.
സമരം ചെയ്തവരും ജുഡീഷ്യൽ അന്വേഷണം നടക്കുമ്പോൾ സോളാർ കേസിൽ ചിലപ്പോൾ പ്രതികളാകും എന്നതാണ് ഇപ്പോഴത്തെ വിചിത്രമായ അവസ്ഥ..!
"മുഖ്യമന്ത്രിയുടെ രാജി മാത്രം പോംവഴി" എന്ന പ്രതിപക്ഷത്തിന്റെ ആവശ്യവും അവസാനിപ്പിച്ചു, "ആവശ്യം നേടുംവരെയും സമരം" എന്ന അവരുടെ പ്രഖ്യാപനവും അവസാനിപ്പിച്ചു. വന്നവർ ഒന്നും പിടികിട്ടാതെ തിരിച്ചു വണ്ടികയറി.
അതാണ്‌ ഉമ്മൻ ചാണ്ടി.

ഉമ്മൻ ചാണ്ടി നാളെ രാജിവയ്ക്കുമോ, മറ്റന്നാൾ രാജിവയ്ക്കുമോ, അതോ ഓണം കഴിഞ്ഞു രാജിവയ്ക്കുമോ എന്നതൊക്കെ വേറെ കാര്യം. നിലവിൽ അദ്ദേഹം ഈ സമരത്തെ അപ്പാടെ മലർത്തിയടിച്ചിരിക്കുന്നു. അതാണു കാര്യം. ഒന്നുമൊന്നും നേടാതെ സഖാക്കൾ അന്തംവിട്ടു മടങ്ങുകയാണ്. കൃത്യമായ ഒരു വിശദീകരണം സമര സംഘാടകരുടെ പക്കലില്ല. "ജുഡീഷ്യൽ അന്വേഷണം എന്നതായിരുന്നു ഞങ്ങളുടെ ആവശ്യം" എന്ന ഇപ്പോഴത്തെ പരിഹാസ്യമായ നിലപാട് സ്വന്തം ജാള്യത മറയ്ക്കാൻ വേണ്ടി മാത്രം.

അനുഭവങ്ങളും ഉദാഹരണങ്ങളും ഒരുപാടുണ്ടായിട്ടും ഇദ്ദേഹത്തെ ഇപ്പോഴും ആരും -കൂടെനിൽക്കുന്നവർ പോലും - ശരിയായി തിരിച്ചറിയുന്നില്ല. കെ. മുരളീധരൻ ഒഴികെ..!!
-----

(NB: "എന്തും ചെയ്തുകൊണ്ട് കൂടെനിൽക്കുന്ന" കുറച്ചുപേരെ സംരക്ഷിക്കാൻ പാടുപെടുന്ന ഉമ്മൻ ചാണ്ടി. "എന്തിനെന്നറിയാതെ കൂടെനിൽക്കുന്ന" പതിനായിരങ്ങളെ വഴിയാധാരമാക്കുന്ന പിണറായി വിജയൻ. ഉമ്മൻ ചാണ്ടിയെ വിശ്വസിച്ചാലും ഒരിക്കലും പിണറായിയെ വിശ്വസിക്കരുത്..!)

 

കടപ്പാട് Photo: Kb Jayachandran,
Metro Vaartha, Thiruvananthapuram